Интервју со Михаела Несторова:Сала најдовме, мотивирани луѓе имавме, со нови идеи и волја од Insanity се претвори во High Intensity Тotal body work out, или денешно ,,Фит М“ - Македонија Денес

Интервју со Михаела Несторова:Сала најдовме, мотивирани луѓе имавме, со нови идеи и волја од Insanity се претвори во High Intensity Тotal body work out, или денешно ,,Фит М“

Опомена!!!

Михаела е доктор по професија, специјализант во областа спортска медицина, асистент на Медицински Факултет на Институт за МЕП Физиологија и инструктор по High intensity total body work out веќе 4-та година.

За читателите на Македонија Денес, Михаела специјално одвои време и не информира за спортот, но овој пат од еден сосема поинаков и дефинитивно постручен аспект.      

МД: „Фит М“, како дојде токму до оваа идеја?

Михаела:Oваа идеа дојде сосема случајно. Тие што беа со мене од самите почетоци знаат дека бевме една мала група луѓе кои бевме желни за тренинзи кои се поинтензивни и какви што не успевавме да најдеме на местата низ Скопје кои држеа групни тренинзи. Сè започна со видеата Insanity и кеј, каде што ги почнавме рекреативно да ги вежбаме видеата. Но дојде зима и кејот веќе не беше поволно место, па тргнавме во потрага по сала. Сала најдовме, мотивирани луѓе имавме, со нови идеи и волја од  Insanity се претвори во High Intensity Тotal body work out, или денешно ,,Фит М“.

МД: Раскажи ни повеќе за твоите почетоци?

Михаела:Од мала сум била спортски активна, тренирав тенис, возев активно ролери, трчав рекреативно на кеј. Некаде во факултетските денови се запишав на аеробик, беше интересно на почеток, но брзо го совладав (ме памтат вежбачките како девојката што секогаш доправаше по некоја или повеќе вежби плус) и ми требаше нешто понапорно. Од едно на друго место, (морам да принзнаам дека посетив многу места за вежбање во околина на Карпош), се додека не дојде до ова што веќе погоре го кажав.

Михаела

МД: Што се вежба во „Фит М“?

Михаела:Во „Фит М“ се вежба високо интензивни тренинзи кои вклучуваат активност на целото тело. Различни тренинзи, некогаш кардио, некогаш силови вежби искомбинирани во интервали или класични повторувања. Работиме и со килажи кои постепено се зголемуваат во зависност од спремноста на индивидуата, почетниците работат со сопствена тежина додека не ги совладаат правилно движењата. Тренинзите се релативно тешки така што секој вежба со сопствено темпо и со својата физичка можност.

МД Кои се бенефитите од овој тип на вежбање?

Михаела:Бенефитите на било кој тип на вежбање се тоа што освен физичкото ви го подобрува и психичкото здравје. При вежбање се ослободуваат хормони: eндорфини и серотонин кои се познати како хормони на среќа, ендорфинот сe врзува со рецептори во мозокот кои ја намалуваат болката ( сте се запрашале ли некогаш зошто кога вежбате ако сте чуствивале на пр. главоболка, за време на тренингот и после тоа не ја чуствувате?). Бенефитите од  овој тип на вежбање се што ја подобрува функцијата на кардиоваскуларниот систем, мускуло-скелетниот ( ја оформува и зајакнува мускулатурата), ендокринот систем (ги контролира лачењето и на други хормони како инсулин, кортизол, соматотропен хормон). И на крај бидејќи станува збор за интезивни тренинзи, нормално дава брзи резултати во физичкиот изглед.

МД: Како ја составуваш програмата за вежбање?

Михаела:Читам, постојано читам статии за вежбање, што е ново, пратам портали и социјални мрежи и користам  нивни идеи во комбинација со моите. Како доктор, познавајќи го физиолошкото функционирање на човечкото тело, и специјализант по спотска медицина познавајќи како се комбинираат вежбите, идеите за тренингот и програмата сами доаѓаат.

Михаела

МД: Од докторски аспект зошто е важно да се вежба?

Михаела:Иако погоре објаснив некои од бенефитите на вежбањето од медицински аспект, мора да се знае дека во ова денешно „лудо” можам да кажам време, каде постојано сме под стрес и во брзање, забораваме на основните навики за искрана, за одмор и се препуштаме на брзата храна и краткиот сон. Вежбањето ни е издувен вентил каде еден час забораваме на обврските и стресот, нѐпоттикнува да се ставиме во режим на избалнасирана исхрана, а сонот ни е подобар и цврст после физичка активност. Вежбањето има удел и во циркадијалниот ритам (сон-будност), ни обезбедува добар сон, а потоа тој е одговорен за поголема фокусираниот во текот на денот, а избалансираната исхрана ни овозможува енергија за извршување на секојдневните обврски.

МД: Кое е твоето мислење, колку пати неделно треба да се вежба?

Михаела:Оптимално за одржување на психо-физичкото здравје е 3 пати по еден час, или 5 пати по половина час. Носекој со своите потреби, апетити и замисла за што сака да постигне.

МД: Како изгледа твоето дневно мени?

Михаела:Моето дневно мени претрпе доста промени во текот на годините. Телото се заситува од еднолична исхрана, и секогаш треба да го слушате што ви бара. Мојот појадок е комбинација од протеини и јаглени хидрати за да можат да ме држат во текот на денот сита, како на пример јајца со парче црн леб,или житарки со јогурт или млеко и некоја овошка. Ужина обавезно, протеински бар, или шака јатки,свежо или суво овошје. Ручек кој вклучува месо и зеленчук, (традиционални македонски манџи) комбинација од протеини, масти и јаглени хидратии, вечера протеинска (јајца, парче месо или риба со салата, супа). Да не ги заборавам и суплементите како магнезиум кој ми помага за намалување на мускулни грчеви, глукозамин за подмачкување на зглоби површини и мултивитамини.

МД: Кои се твоите препораки во врска со исхраната пред и после тренинг?

Михаела:Општите препораки за луѓе кои се физички активни се 50% на јаглени хидрати, 30% на масти и 20 % на протеини, поделени во 3 главни оброци и две ужини. Можам да кажам дека тоа се и моите препораки. Јаглехидратите се основен извор на енергија и треба да се консумираат во првиот дел од денот, мастите и протеините за ручек и пред тренинг за да обезбедат ситост во текот на тренингот, а во зависност од дали со вежбањето сакате да ја намалите или зголемите телесната тежина, тогаш за вечера се протеините ако сакате да намалите или во комбинација со јаглени хидрати ако сакате за зголемите телесна тежина. Протеините се основа за градење на мускулите, па така ако нормално човек треба да внесува 0.8 г протеин на кг. телесна  тежина, оние кои вежбаат би требало 1г/кг телесна тежина, а пак оние што целат кон поинтезивно зголемување на мускулната маса би требало 1,5г/ кг телесна тежина протеини да внесуваат. Мастите се резервата за кога ќе ги потрошиме јаглените хидрати, така да тие што се послаби и имаат за цел за ја зголемат телесната тежина, треба да не ги забораваат истите, како од растително потекло ( маслинов зејтин, јатки, авокадо..) така и од животинско потекло ( путер, млечни производи, жолчка).

Михаела

МД: Дали водата игра важна улога при вежбањето?

Михаела:Нормално, правилната хидратација во текот на целиот ден е многу важна, а не само во текот на тренингот. Ако цел ден заборавите да пиете вода, а во текот на тренингот испиете литро, сигурно дека ќе ви се слоши. Мали голки, за влажнење на устата без препивање се оптимални. Дехидратацијата може да доведе до мускулни грчеви, главоболка, сувост на кожата. Секако не значи дека треба да се налевате со вода, затоа што и непотребно ги оптоварувате бубрезите, 2 до 2.5л вода во текот на денот и во зависност од условите се доволни. Се разбира летниот период кога пообемно се потите ви треба повеќе вода, за разлика од зимниот период.

МД: Како се мотивираш во деновите и кога баш не ти се држи тренинг?

Михаела:Со добра музика и со ликовите на вежбачите кои ќе ги видам дека и на  -15°C   и снег до колена и +40°C  дошле на тренинг.

МД: Дали постои старосна граница за вежбачите во „Фит М“?

Михаела:Мајка ми само што наполни 53г ( Упс ) и е редовна на тренинзите, така да за оние што се здрави и мотивирани не би рекла дека има, нормално со свое темпо и модификација на некои поекстремни вежби.

МД: Што мислиш на темата „трудници кои напорно вежбаат“?

Михаела:Секоја бременост е различна, иако сум доктор не можам да имам цврст став со тоа, без консултација на гинеколог. Доколку бременоста е физиолошка, а таа мајка до тогаш била физички активна, продолжување со умерена физичка активност која искучува одредени ризични  вежби, да. За мајка која не била или била слабо активна во текот на бременоста да почне да се изложува на нови предизвици во однос на вежбање мислам дека сите ќе се согласат дека е неприфатливо. Сепак гинекологот е тој кој што ја води бременоста и треба да препорача или не физичка активност.

МД: Кои се твоите идни планови за „Фит М“?

Михаела:Како што се почна спонтано така го оставам и да продолжи да се одвива, плановите изгледа сами си се прават, а јас само ги прифаќам.

МД: Дали имаш некоја успешна приказна да споделиш?

Михаела:Еве мојата. Како случајно се инволвирав да влезам во овие води и да имам контакт со толку позитивни луѓе, и да изградам познанства па и пријателства со нив.

МД: Дали читателите можат да те најдат на социјалните мрежи?

Михаела:Нормално, на facebook и Instagram.

Разговараше: ЛП

Колку вистина има во она „во виното е вистината“?

 

Опомена!!!

Поврзани вести

Translate »